Olimpik mesh'ilini qarshi élish pa'aliyiti éghir bixeterlik tedbirliri astida élip bérildi

2008-03-31
Élxet
Pikir
Share
Print

Aldinqi küni grétsiyining afina shehiride xitay olimpik teshkillesh komitétigha tapshurup bérilgen olimpik mesh'ili düshenbe küni etigen xitayning béyjing shehirige yetküzülgen.

Birleshme agéntliqida körsitilishiche, mesh'el béyjing ayrodromdin tyen'enmén meydanigha yetküzülgiche xitay saqchi we qoralliq saqchi qisimliri mesh'el toshulidighan asasliq yolgha kirish éghizlirida we köwrüklerde tosuq qurup bixeterlik tedbirlerni kücheytken.

Uningdin bashqa, tyen'enmén meydanidiki ikki métro békiti taqalghan we nurghunlighan saqchilar métro béketliride qarawulluqqa turghuzulghandin bashqa, saqchilar wélisipit we piyadiler yolinimu taqap yoluchilarni pa'aliyet meydanidin bir kilométir da'iride tosup qalghan.

Düshenbe küni etigende tyen'enmén meydanida béyjing olimpik mesh'ilini qarshi élip olimpik mesh'ilini yetküzüsh murasimida xitay prézidénti xu jintaw sözge chiqqan we olimpik mesh'ilini yetküzüsh pa'aliyitining resim bashlan'ghanliqini jakarlighan.

Mesh'el xitay sirtidiki 21 sheherde toxtap ötidighan bolup, düshenbe küni béyjingda bir kün turghandin kiyin seyshenbe küni qazaqistanning almata shehirige yetküzülidu.

Mölcherlinishiche, almuta, istanbul, we sanpétérburg sheherliride olimpik mesh'ilige egiship élip bériliwatqan béyjing olimpikige naraziliq bildürüsh pa'aliyetliri qanat yaydurulmasliqi mumkin, emma mezkur mesh'el london, parizh we sanfranssko sheherlirige kelgende kishilik hoquq teshkilatliri we tibetni himaye qilghuchi teshkilatlarning éghir tosqunluqigha uchrishi mumkin iken. (Jüme)

Pikirler (0)
Share
Toluq bet