Хитай, русийә вә оттура асия сотчилирини уйғурларға қарши хитай билән һәмкарлиқни күчәйтишкә чақирди

2006-09-22
Елхәт
Пикир
Share
Принт

Хитай, шаңхәй гуруһидики русийә вә оттура асия әллириниң алий сотчилирини хитай билән террорчилиққа қарши һәмкарлиқни күчәйтишкә чақирди. Хитай әмәлдарлири пәйшәнбә күни башланған шаңхәй гуруһидики дөләтләр алий сотчилириниң йиғинида пәқәт террор, бөлгүнчилик вә диний әсәбийликкә зәрбә бәргәндила сиясий муқимлиқни сақлиғили болидиғанлиқини тәкитлигән.

Хитай алий сот мәһкимисиниң муавин башлиқи җаң җүн, "бөлгүнчилик вә әсәбийлик байриқини көтүрүвалған һәр хил - һәр шәкилдики террорлуқ паалийәтләр қутрумақта " дәйду. Хитай даирилири уйғур мустәқиллиқ һәрикити яки уйғур сиясий , диний өктичилирини " үч хил күчләр " дәп әйиблисиму, лекин кишилик һоқуқ тәшкилатлири хитай террорчилиқни баһанә қилип, уйғурларни бастурмақта, дәп қарайду.

Америка ташқий ишлар министирлиқиниң диний әркинлик доклатида, хитай даирилирини уйғур диний паалийәтчилири вә сиясий өктичиләрни террорчилар билән бир орунға қоймақта, дәп әйиблигән. Чәтәл мәтбуатлириниң хәвәр қилишичә,хитай әмәлдарлири йиғинда шәрқий түркистан күчлириниң паалийитини бу дөләтләрдә " җинайи һәрикәт" дәп тонуш вә бу кишиләрни хитайға өткүзүп беришкә чақирип, бу шәкилдә районниң бихәтәрликигә төһпә қошушни тәләп қилған.

Дуня уйғур қурултийи болса бу йиғинни әйиблиди. Қурултай баянатчиси дилшат ришит," хитай шәрқий түркистан мәсилисини террорчилиқ билән бағлап, уйғурлар билән бейҗиң арисидики игилик һоқуқ мәсилисини йошурмақта " дәйду. (Әркин)

Пикирләр (0)
Share
Толуқ бәт