Вен җябав хитайниң һәрбий селинмидики артишини ақлиди

2006-03-14
Елхәт
Пикир
Share
Принт

Хитай баш министири вен җябав сәйшәнбә күни бейҗиңда чақирған мухбирларни күтүвелиш йиғинида, дуня бойичә әң зор көләмгә игә хитай қораллиқ қисимлирини башқа дөләтләргә тәһдит әмәс, дәп ақлиди вә хитай һәрбий хам чотиниң йилда икки рәқәмлик сан билән көпийип бериватқанлиқини һәрбийләрниң турмуш шараитини яхшилаш, дәп чүшәндүрди.

Хитай һөкүмити өткән һәптә хитай қораллиқ қисимлириниң бу йилқи һәрбий хам чотини 7.14 Пирсәнт өстүрүп, 283 милярд 8 милйон йүәнгә чиқарған. Вен җябавниң әскәртишичә, бу пулни һәрбийләрниң маашини өстүрүш, һәрбий әслиһәрләрни йеңилаш, тәлим - тәрбийә вә нефит баһасиниң өсүп кетиши қатарлиқ түрләргә ишлитидикән. Вен җябав, " җуңго күнләрниң биридә күчәйгән тәқдирдиму башқиларниң ички ишлириға арилашмайду яки башқиларға зиян салмайду " дәйду.

Хитай һөкүмити 1990 - йиллардин бери һәр йили һәрбий хам чотини икки рәқәмлик сан билән өстүрүп бармақта. Хитайниң бу йилқи һәрбий хам чоти униң омуми дөләт хам чотиниң 4.7 Пирсәнтини тәшкил қилған. Бирақ хитай һәрбий хам чотиниң йилдин - йилға өсүп меңиши хитайниң қошнилири вә америка қатарлиқ дөләтләрни биарам қилмақта.

Америка дөләт мәҗлисидики затларниң әскәртишичә, хитайниң һазирқи мәвҗут һәрбий күчи униң миллий бихәтәрликини қоғдашқа еһтияҗ болған һәрбий күчидин көп ешип кәткән. (Әркин)

Пикирләр (0)
Share
Толуқ бәт