Xitay yéngi rehberlik sistémisini békiti

2008-03-16
Élxet
Pikir
Share
Print

Tibetlerning namayishliri we "7 - mart ayropilan weqesi" ge chétilghan Uyghurlar mesilisi xelq'ara metbu'atlarning muhim témisigha aylan'ghan bu künlerde xitayning dölet rehberlik sistémisi qaytidin békitildi.

Shinxu'aning xewerlirige asaslan'ghanda, xu jintaw dölet re'islikige, shi jinping mu'awin re'islikke békitilgen. Xu jintaw 16 - mart küni birinchi nomurluq buyruq élan qilip, wén jyabawni xitay xelq jumhuriyitining bash ministirliq wezipisige teyinligen.

Xelq qurultiyining mudirliqigha wu banggo saylan'ghan bolup, 160 nechche kishidin terkip tapqan xitayning mezkur qanun turghuzush orginigha sabiq Uyghur aptonom rayon re'isi isma'il tiliwaldi bilen xelq qurultiyi mudiri abduréhim hamut kirgen. Isma'il tiliwaldi mu'awin mudirliqqa békitilgen bolup, bu orunni ilgiri uzun yillar seypidin eziz, uningdin kéyin tömür dawametler tutup kelgen idi. Isma'il tiliwaldi téxi yéqindila Uyghur aptonom rayon re'islikidin qaldurulup, uning ornini chet'ellerdiki Uyghur teshkilatliri teripidin "qosh tilliq ma'arip siyasiti nami astida Uyghur tili ma'aripini yoqitishning bayraqdari "dep teripliniwatqan nur bekri igiligen idi.

Shinxu'aning xewer qilishiche, 16 - mart küni pakistan, sin'gapor, yaponiye, namibiye, shimaliy koriye qatarliq 10 din artuq dölet bashliqliri we bash ministirliri hem parlamént rehberliri xu jintaw, wénjyabaw we bashqilarni tebrikligen, emma, rusiye, amérika gérmaniye, en'gliye, fransiye qatarliq dunyaning yirik döletlirining rehberliri téxi ularni tebriklimigen. Bu künlerde yene tibet rohaniy dahiysi dalay lama xelq'ara jem'iyetni lxasadiki weqening heqiqiy ehwalini tekshürüshke chaqirghan idi. (Ümidwar)

Pikirler (0)
Share
Toluq bet