Хитайниң йеңи бәлгилимилири җ х органлириниң һоқуқини күчәйтти

2006-03-01
Елхәт
Пикир
Share
Принт

Хитай һөкүмити чаршәнбә күни " җәмийәт аманлиқини тәртипкә селиш вә җазалаш қануни" ни елан қилип, җамаәт хәвпсизлик органлириға техиму көп җазалаш һоқуқи бәрди.

Әнглийә б б с радио-телевизийә ширкитиниң хәвиригә қариғанда, йеңи чиққан бу қанун бурунқиға селиштурғанда җ х органлириниң җазалаш һоқуқини техиму күчәйтиш билән биргә, қанунға хилаплиқ қилған чәтәлликләрни бир тәрәп қилиш һәмдә уларни чегридин қоғлап чиқириш бәлгилимилириниму қошумчә қилинған.

Хитай җамаәт хәвпсизлик министирлиқиниң қанун-түзүм идариси башлиқи ке ляңдоң, гәрчә чәтәлликләрни чеградин чиқириш мәсилисидә ениқ бәлгилимә болмисиму, лекин чәтәлликләр хитайниң бу "җәмийәт аманлиқини тәртипкә селиш вә җазалаш қануни" ға хилаплиқла қилидикән, уларниң чеградин қоғлап чиқирилиш еһтималлиқиниң барлиқини тәкитлиди.

Йеңи чиқирилған бу бәлгилимә йәнә кәң даиридики мәзмунларни өз ичигә алған болуп, қанунсиз вә җәмийәткә зиянлиқ дәп қариған диний паалийәтләрни җазалаш җәһәттиму нурғун бәлгилимиләр көрситилгән. Әмма униңда йәнә, сақчиларниң дело беҗиргәндә кишиләрни қийин-қистаққа елип сорақ қилиши чәкләнгән һәмдә бундақ қилғучиларниң қануний мәсулийити сүрүштә қилинидиғанлиқи көрситилгән. Хитайда әзәлдин сақчиларға көп һоқуқ берилгән болуп, бу ғәрб әллириниң изчил әйиблишигә учрап кәлгән иди. (Пәридә)

Пикирләр (0)
Share
Толуқ бәт