Kaliforniyede "Rohin'ga we Uyghur kirizisigha taqabil turush boyiche yehudiy we musulmanlar hemkarliqi" yighini ötküzüldi

Muxbirimiz méhriban
2019-10-31
Élxet
Pikir
Share
Print
Amérika alem qatnishi idarisining inzhénéri doktor erkin sidiq ependi we "Los-anzhélis amérika-Uyghur birleshmisi" idare hey'itining ezasi nurnisa qurban xanim yighin'gha kirish aldida. 2019-Yili 27-öktebir, los anzhélis.
Amérika alem qatnishi idarisining inzhénéri doktor erkin sidiq ependi we "Los-anzhélis amérika-Uyghur birleshmisi" idare hey'itining ezasi nurnisa qurban xanim yighin'gha kirish aldida. 2019-Yili 27-öktebir, los anzhélis.
RFA/Méhriban

Igilishimizche, 27-öktebir küni los-anzhélistiki "Jenubiy kaliforniye islam merkizi" de "Rohin'ga we Uyghur krizisigha taqabil turush boyiche yehudiy we musulmanlar hemkarliqi" témisidiki yighin ötküzülgen. Bu yighin kaliforniyediki "Yehudiylarning dunyani közitish jem'iyiti" ning diréktori en strimow durbin xanimning riyasetchilikide échilghan. Yighilishqa shu yerdiki yehudiylar, Uyghurlar we rohin'ga musulmanliridin bolup, 100 din artuq adem qatnashqan. Yighin bir sa'ettin artuq dawam qilghan.

Yighin'gha kaliforniyediki Uyghurlardin amérika alem qatnishi idarisining inzhénéri doktor erkin sidiq ependi we "Los-anzhélis amérika-Uyghur birleshmisi" idare hey'itining ezasi nurnisa qurban xanim qatarliqlar mexsus Uyghurlar weziyiti heqqide doklat bérishke teklip qilin'ghan.

Doktor erkin sidiq ependi bilen nurnisa qurban xanim radiyomiz ziyaritini qobul qilip, yighin heqqide melumat berdi.

Doktor erkin sidiq ependining bildürüshiche, u yighinda nöwettiki Uyghurlar weziyitini anglatqan. Nurnisa qurban xanim Uyghurlargha wakaliten "Yehudiylarning dunyani közitish teshkilati" din kütidighan ümidi we teleplerni otturigha qoyghan.

Ziyaritimiz jeryanida nurnisa qurban xanim yene mezkur yighinda özining otturigha qoyghan pikirlirini bayan qilip ötti.

Nurnisa qurban shu kündiki yighilishta Uyghurlar weziyiti asasiy munazire témisi bolghanliqini bildürüp, köpligen yighin qatnashquchilirining özidin "Néme üchün kommunist xitay hökümiti Uyghurlarni yoqatmaqchi bolidu? biz silerge néme qilip béreleymiz?" dégendek so'allar sorighanliqini ilgiri sürdi. U özi we erkin sidiq ependi ikkiylen ulardin Uyghurlar üchün bundaq munberlerni köprek hazirlap bérish, Uyghur mesilisini téximu köp kishilerge anglitish, "Uyghur kishilik hoquq qanun layihe" sining amérika hökümiti teripidin tézrek testiqlinishigha yéqindin yardemde bolushni telep qilghanliqini bildürdi.

Nurnisa qurban xanimning bildürüshiche, "Los-anzhélis amérika-Uyghur birleshmisi" ning los anzhélistiki "Yehudiylar dunyani közitish jem'iyiti" bilen bolghan hemkarliqi 2019-yili 3-ayda bashlan'ghan iken. Ular bu jeryanda mezkur jem'iyetning yardimide kaliforniyediki 53 neper awam palata ezasini tizimlap chiqip, ular bilen ayrim-ayrim körüshken. Ular özliri körüshken awam palata ezalirini "Uyghur qanun layihesi" ni qollap awaz bérishke chaqiriqi qilghan. Undin bashqa bu yil 9-ayning 6-küni ikki teshkilat birlikte los-anzhiléstiki shitatliq hökümet binasi aldida xitay hökümitining Uyghurlarni basturushigha qarshi birleshme naraziliq namayishi ötküzgen.

Nurnisa qurban xanim ziyaritimiz dawamida yene bundin kéyinki pa'aliyet pilanlar heqqidimu toxtilip ötti.

Uning bildürüshiche, 2019-yili 11-ay ichide yene bu ikki teshkilat birlikte birnechche pa'aliyetni hemkarliship birlikte ötküzüshni pilanlighan iken. Ular kaliforniyediki yuqiri téxnika shirketliridin xitay bilen hemkarlashqan shirketlerni tépip chiqip, ulargha Uyghurlar uchrawatqan basturulush ehwallirini anglitidiken. Kaliforniyediki shirketlerni xitayning Uyghur rayonidiki yuqiri téxnikiliq teqib qilish sistémiliri qurulushigha qatnashqan xitay shirketliri bilen hemkarlashmasliqqa, ularni xitay shirketliri bilen téxnika we soda alaqiliride bolmasliqqa dewet qilidiken. Ular yene kaliforniyediki shirketliridin lagérdiki Uyghurlarni mejburiy emgekke salghanliqi éniqlan'ghan xitay shirketliri we fabrika-zawutlirining mallirini kirgüzmeslikni telep qilidiken.

Tepsilatini yuqiriqi awaz ulinishidin anglighaysiz.

Toluq bet