Доктор закир найик: уйғурлар дуняда әң еғир зиянкәшликкә учраватқан мусулман милләт

Ихтиярий мухбиримиз арслан
2019-08-14
Елхәт
Пикир
Share
Принт
Ислам дунясидики мәшһур дәвәтчи диний алим доктор закир найик әпәндиниң уйғурлар тоғрисида сөзләватқан көрүнүши. 2019-Йили 9-авғуст, малайсия.
Ислам дунясидики мәшһур дәвәтчи диний алим доктор закир найик әпәндиниң уйғурлар тоғрисида сөзләватқан көрүнүши. 2019-Йили 9-авғуст, малайсия.
Social Media

Ислам дунясидики мәшһур дәвәтчи диний алим доктор закир найик, 9-авғуст күни малайшияниң келантан районидики путбол мәйданида ечилған чоң йиғинда уйғурлар тоғрисида сөз қилип, дуняда әң еғир зиянкәшликкә учраватқан мусулман милләтниң уйғурлар икәнликини билдүрди.

Доктор закир найик уйғурлар һәққидики бу сөзлирини 30 миң киши қатнашқанлиқи илгири сүрүлгән йиғинда қилған болуп, у дуняда әң көп зиянкәшликкә учраватқан мусулман милләтниң уйғурлар икәнликини тәкитләп, мусулманларни уйғурларни қоллашқа чақирди.

У мундақ деди: «мән силәрдин бир соал сорап бақай, һазир дуняда әң чоң зиянкәшликкә учраватқан мусулман милләт қайси? бирмадики роһиңга мусулманлириму? пәләстинлик мусулманларму? қени ойлап беқиңлар. Мәнчә болғанда һазир әң еғир зиянкәшликкә учриғучилар болса уйғур мусулманлиридур. Әлвәттә бирмада вә пәләстиндиму мусулманлар зиянкәшликкә учраватиду, әмма хитайдики зулум башқичә бир дәриҗидә болмақта. Чүнки, пәләстиндики мусулманлар һеч болмиғанда намаз оқуялайду, улар аллаһуәкбәр дейәләйду, улар рози туталайду, улар қуран оқуялайду, әмма хитай уларниң һәммисини системилиқ һалда йоқатмақчи болуватиду». 

Доктор закир найик сөзидә йәнә уйғурларниң нөвәттә дуч келиватқан қийинчилиқ мәсилилирини оттуриға қоюп мундақ деди: «хитайда икки түрлүк мусулманлар болуп бири бу уйғур мусулманлар, йәнә бири туңганлар, гәрчә улардиму наһәқчилик болсиму әмма уйғурларға селиштурғанда наһайити аз һесаблиниду. Уйғурларға намаз оқуш, рози тутуш чәкләнгән, рамизанда тамақ йейишкә зорлайду, һарақ ичишкә мәҗбурлиниду, әрәб тили өгинишкә йол қоймайду, кимики даириләрниң гепини аңлимиса дәрһал лагерларға йоллайду. Хитайлар буни тәрбийиләш мәркизи дәйду, у йәрдикиләр түрлүк қийин-қистақ, дәхли-тәрүзләргә учрайду, динидин ваз кечип коммунизмни қобул қилишқа зорлиниду, камера вә йүзини тонутуш аппаратлири билән қаттиқ назарәт қилиниду». 

Доктор закир найик сөзидә йәнә уйғурларниң кишилик һоқуқ дәпсәндичиликлиригә учришиға сүкүт қиливатқан ислам дөләтлирини тәнқид қилип мундақ деди: «буларни паш қилған кишилик һоқуқ тәшкилатлири һәммиси ғәйрий мусулман тәшкилатлар болуп, бир ай бурун йәни 7-айда 22 дөләт бирләшкән дөләтләр тәшкилатиға мәктуп йоллап уйғурлар үстидин йүргүзүлүватқан кишилик һоқуқ дәпсәндичиликигә етираз билдүргәниди. Бирләшкән дөләтләр тәшкилатида 195дөләт бар болсиму пәқәт 22 дөләт бу дәпсәндичиликкә қарши етираз билдүргән. Улар һәммиси ғәйрий мусулман ғәрб әллири болуп, бирму мусулман дөлити етираз билдүрмигән. Дунядики дөләтләрниң төттин бири, йәни 56 дөләттә мусулманлар көп санлиқни игиләйду, шундақ туруқлуқ 22 ғәрб дөлити қарши турған, мусулман дөләтлиричу? бәлким улар биз мусулманлар аҗиз, қаршилиқ көрситиш бизгә мәнпәәт бәрмәйду дәп қариғанду?, әгәр улар мушундақла ойлап җим турған болса буни биртәрәптин тоғра чүшинишкә болатти, әгәр һәрикитидә, ипадисидә қаршилиқ қилалмиса қәлбидә болсиму билип сүкүт қилса ислам дининиң чоң зиянниң алдини елиш үчүн кичик зиянға йол қоюш пиринсипини қолланған болатти, әгәр қарши турса уларниң дөлитигә зиян болидиған иш болса, һәрикити билән, тили билән қаршилиқ қилалмиса сүкүт қилған болса исламда йол бар иди, бирақ иш буниңлиқ билән түгимиди, нәччә күндин кейин 37 дөләт бирләшкән дөләтләр тәшкилатиға хәт йезип хитайни кишилик һоқуқни дәпсәндә қилмиди, мусулманларға зулум қилмиди, улар террорлуққа қарши туруватиду, мусулманларни тәрбийәләватиду деди. Уларниң ичидә 15 мусулман дөлити болған, аллаһқа шүкүрләр болсунки малайшия униң ичидин орун алмиди. Мән бу дөләтләрни тилға елишни халимаймән, чүнки мән мусулманларни ойғитишни нишан қилимән, алланиң инайити билән бу дөләтләрниң көпинчисиниң әмәлдарлири билән көрүшкәнмән, һәр қетим мән дәвәтчи болуш сүпитим билән уларға һәқни йәткүзимән, бирақ аңлаш-аңлимаслиқ уларниң иликидә. Мән уларни осал қилип қоймақчи әмәс, пәқәт улардин шуни тәләп қилмақчимәнки, пәйғәмбәр әләйһиссаламниң, 'мусулманлар бир бәдәнгә охшайду, униң бир қисми ағриса һәммә қисми ағриқ һес қилип, уни бирликтә қоғдайду‹ дегән. Мана бу бир үммәттур».

Доктор закир найикниң уйғурлар тоғрисида сөзлигән синалғу видийоси иҗтимаий таратқуларда кәт тарқитилди. 

Биз доктор закир найикниң уйғурлар тоғрисида тохталған баянатлири тоғрисида, австралийәдики уйғур диний өлима абдусалам алим пикир баян қилип, доктор закир найиктәк дуняда тонулған бир алимниң кечикип болсиму уйғур мәсилисини оттуриға қоюшиниң яхши нәтиҗә беридиғанлиқини тәкитлиди. Доктор бурһан саити әпәндиму униң сөзлириниң зор тәсир күчкә игә икәнликини билдүрди.

Доктор закир найик ким?

Доктор закир найик әсли һиндистанлиқ бир оператсийә мутәхәссиси болуп, 1965-йили туғулған. У, дини дәвәтчи болуп, америка қатарлиқ көплигән дөләтләрдә йиғинларға қатнишип дәвәт қилип келиватқан мәшһур киши. У инглизчә, ордучә вә бенгалчә программа тарқитидиған «пәачә тв» (Peace TV) телевизийә қанилиниң вә һиндистандики ислам тәтқиқат фондиниң қурғучиси икән.

Пикирләр (0)
Share
Толуқ бәт